بدون سبب

بدون سبب

جسمى اتسحل ... أنا عود قصب
و جروحى كاس ... فى الدنيا صب
بطل آهات ... قلة أدب
والسجع لأ ... بدون سبب
والبحث عن قافية تعب
وأحسب ما بين غلب وغلب
وأقسم وأزود وأنضرب

سيبك من الأحلام تطيش
سيبك من الأيام وعيش
الدور ده كله هينقلب ...

بختك يا أبو بخيت

بختك يا أبو بخيت

بختك يا بو بخيت

يا صغير ع الهم يا خويا

و حكاوى الحواديت

بتجوب أى مدينة يا خويا

***

زعلان ليه و إنت المقصود

رزق الهبل على المجانين

و خطاوى بتطول و تطول

و بتحلو على المهبول

والمجذوب وهدومه الوسخة

قذرة ... يالهوى و زى النيلة

قال ايه بيحب الترحيلة

و يحب البنت أم الضفاير

و ينور قلب الترحيلة

***

هو انت عبيط ... لأ أنا حريف

و حريقة فى شغل البهلوانات

و صفاتى حاجات و حاجات و حاجات

و مداسى كبير ... و آلامى سرير

ما أنا شامى و فينو و بلدى غشيم

مرضان ضعفان رغم التطعيم

***

الله الله يا بدوى

جاب اليسرا

و ارتاح فى الطل

ياحلوللى يا مرجيحة أطفال

كان نفسى أفضل عيل

يا سلام

كان نفسى أهلفط أى كلام

و أنا أصلى بأكون و حأكون و أنا "كان"

يضايقنى ولاد الحارة بغيظ

يرمونى بطوب و قلاح مبروم

يسرقوا منى أحلام بالكوم

يلعبوا على باب بيتنا يسدوه

أيا خلق هووه ...

يا ولاد الايه ...

الهدمة اللى محوشها للعيد

تستاهل كدة برضه و تنداس

وأنا بلعب قطر يصفر توت

قال ايه بحماس

تفتكروا هأصلى صلاة العيد

لبيك الله أنا لبسى جديد

القطر يصفر فى محطات

لبيك الله أنا نفسى أموت

توت توت توت توووت

العمر أهو فات

العمر يفوت ...

الطيابة

الطيابة

أنا الكلام والابتسام

والطبطبة وبرج الحمام

أنا حلم أبيض فى المنام

أنا قلب بيساع الآلآم

لكنى مش فارس حصان

مش واد فتك ولا دون جوان

أنا فى الزمان ده ماليش مكان

***

أنا الطيابة والحنان

أنا الشجن والاحتضان

انا الأمان مش الجنان

أنا نهر مش بحر الكوارث

أنا زرعة تكبر ف المدارس

أنا لسه دنيا جديدة خالص

***

أنا روح بتشتاق للسعادة

أنا قلب يكبر كل مدى

أنا مش زيادة أنا قهوة سادة

أنا الوليد قبل الولادة

***

أنا الوتر وسط الصخب

وأنا الهدوء وسط الغضب

وأنا الشجر وسط اللعب

وأنا القلم وسط الكتب

وأنا المطر تحت السحب

***

أنا أنا ... غلبان و محلا غلبنا

قصقت ضفرى بقلبى أنا

وقتلت جوايا الأنا

والغل جوايا اتفنى

أنا بالطيابة أدفى أنا

***

السوق كبير ومافيش زبون

ولا حتى بياع للجنون

ولا حاوى يلعب بالظنون

ولا الأمير ولا الغفير

ولا حتى عندى مقام كبير

ولا العبان و لا القدير

ولا شيخ ولا راهب ف دير

ولا عقل يروش ولا بير

ولا عضلات ولا واد خطير

***

أنا أنا

أنا الهوا

أنا نسمة طايرة ف الهوا

هييجى يوم و تقبلى

تبقى الدوا وأبقى الدوا

هييجى يوم وترجعى

الكون الى يوم ما ارتوى

هييجى يوم و نكمل الناقص سوا ...