أغنية لزبال

أغنية لزبال



بحرك كلام

وكل قصة ورق ... متشبكة فى فستان

علب صفيح ... شراشيب فيونكة مقطعة

صورة لقصة حب فيها ذكريات

وازازة فيها دوا وفيها جراح

دى مش زبالة ... دى الزمان

وألف ألف حكاية فيها جنان

فتش و دور ... يمكن تلاقى ألف ايد

تحسسك انك وليد

وتوحدك مع البعيد

وتشنكلك وتقندلك ... ويدق قلبك فى الوريد



كل البشر نفس الصفات

كل البشر فيهم حاجات

انت اللى هتنقى اللى فات واترمى

انت اللى أقرب للسما
زبال و لكنك أمير ...

بنت الخير

--------------
واخدة من القلوب فرحة
سارقة من العيون دمعة
فاهمة ان الحياة مفتاح
وفى عيونها وسع وبراح

قدم للخير
وروح وضمير
وواهبة عمرها للغير

وهى اللى بدت حوا
ف قلبى وفى العروق جوا

ياأحلى ما شافت عينى من الارواح
يا ألف صباح
--------------------------------
انا برتاح على ربوعك
وببنى بيتى ف ضلوعك
فى طاعة ربى انا طوعك

يا احساسى اتملى بالورد
هزار او جد
سؤال او رد
انا بأعشق تفاصيلك وتفكيرك
وبأعشق ان انتى كده
وفيكى رضا
يا عمرى بدا
-----------------------------------
يا حنه قلبى اتحنى
ولما تروقى يتهنى
ولما تقولى يتأنى
ولما تعيدى يستنى
يامفتاحى الى الجنة
-------------------------------------
ياعارفة ربنا بالحق
مخبية الشيطان فى الشق
و قاتلة ف النفوس الشر
مودية الامل للبر
مفيش ف ربيعك أى يوم حر
-------------------------------------

يانور على قلبنا يترش
و يا حالمة بكرسى العرش
يا سابحة فى السبع سموات
يا واصلة المستحيل بالذات
يادنيا فى فضا التسبيح
ويا سلوى لكل جريح
-------------------------------
يا ست الكل..بنت الخير
يا قلب الخصة قلب الطير
ياأحن من الحنان كله
ياضل ملايكة بيصلوا
يا جسر يوصل الرحمة
ويا لقيانى ف الزحمة
أنا المجذوب فى زحمة مولد الدنيا
كما التايه فى دنيا صغيرة وفانية
يشاء المولى تتجلى
تبلى قلبى وتحلى
تحررى عمر عمره أسير
وتمليه بالحنان والخير
يابنت الخير
...............